雖然結果已如預期，但我真係唔明白一場大龍鳳去問人對立法會去留問題嘅意見為乜……有咩好問呢？
民選嘅立法會期完左嘞喎……樣樣都唔禁，係禁你個選舉而extend出黎嘅立法會，即係冇得你選亦唔俾你選嘅，一直要求普選同公平選舉嘅人到底贊成左啲咩呢？
仲要大大聲聲話要守住立法會嘅，咁到底剛過去嘅一年，仲在任嘅你（地）點守住、做左咩守住、守左啲乜？
我當你啱哂，真係要守住議會，唔好俾惡法暴政話過就過，如果唔係乜都會黎……Sorry，你嘅往績、你會大大聲要求佢還我選舉嘅同時又接受欽點嘅情操，都令我唔可能相信你對於邊刻先要守嘅判斷。
如果立法會議席係重要，你地第一樣要守嘅應該係我地本來應該有嘅選舉，而唔係議席。莫忘記你仲係立法會議員，如果你認為香港呢一刻真係好需要呢個身份、呢個議席，去守住議會嘅，首先應該守左個選舉先。放棄或者守唔到選舉，然後不斷話個議席幾重要，香港幾需要，真係令人茫然（呢種邏輯嘅出現）。
講到底，仆到埋去啲唔係民主選舉嘅議會，話自己要守住啲不公義嘅議案……呢件事太本末倒置，我好難接受到。
我實在唔可能贊成。
功能組別已經夠衰，起碼好一部份都係叫由小圈子「選」入去，唔使選嘅以前成日俾人鬧，每年大大聲聲嗌消除功能組別果啲，依家咁衰仔自己鼓吹走去俾人欽點做花樽，咁叫每年七一上街嘅人如何是好？我怕你變左保齡球樽，個人以後都企唔返直，挺唔起胸膛。
堅持啱嘅道理好難？
P. S. 坦白講，其實問卷調查定去留呢樣野本身都好荒謬！我覺得議員真係唔係咁做……作為議員，你本身有立場有見地（或者意見啦），而面對應否留任嘅抉擇嘅，其實亦係你本人，應該係由你去話俾我地知你認為應該留或離，點解要留或離，你應該係意見領袖，而唔係聽意見領袖吧？
當我入到去料理店黎個Omakase時，個廚師問返我今日食海膽定拖羅……
（此文純為發洩不滿，故改用廣東話，請諒！）
沒有留言:
發佈留言